2014年11月30日

自購非廣告: 正負評參半 STEVE MADDEN 高跟鞋


首先申報先,嗱,呢個Brand絕對同我無瓜無葛,
我自費幾年,而佢亦無俾過任何好處我,
所以以下內容純個人感受,清清白白。

我仲記得,當年同一個好有品味嘅女同學行街,係行海港城,
嗰陣我仲係著converse,佢係High heels女皇,
行過STEVE MADDEN佢講咗句:「STEVE MADDEN D鞋真係好夠高好靚。」

當時我同佢都無買到,但呢句說話我一直都有記住。


2012年尾,
有次因為宴會要買對似樣D嘅鞋,就入咗去睇,
我記得嗰對鞋都要$1300,又真係著得對腳幾修長,
但係勁難著!著一次,對腳就損一次!

後來唔信邪又買咗對Platform,好鬼靚仲幾好著,
又不過鞋底離奇地無坑紋,
有次無唯意落雨著,跣到我七個一皮!


又咁講,如果鍾意高,STEVE MADDEN真係夠晒高,
著上去充滿自信,出event或者唔需要劇烈走動嘅場合,
影相效果確實不錯,但要行要企就唔好喇。



否則盞辛苦自己!呢個就係尋日著住行街嘅後果。


所以推介度就50 50啦,款靚嘅,又好襯,
只係實在太高同埋好難行,暫時真係買唔到一對係行得舒服,
買定唔買,就真係睇你要求。

不!過!有!個!超!級!重!點!
就係記得唔好原價買,事關呢間嘢成日失驚無神大減價,
上個月過千嘅鞋款,可以減到$299一對!
仲要加$99多一對!衰到無人有!分分旺中都唔夠佢平!
簡單D講,就係唔好咁傻買正價鞋呀。

呢個就係我成日死死地氣又買返佢嘅原因,
好似做人咁,可能有D嘢唔夠好,但總有D位又令你死心塌地,
係咁㗎喇。
***

3 則留言:

Related Posts Plugin for WordPress, Blogger...